Ang Walang Gutom Program (WGP) ng DSWD ay nakatulong na sa 300,000 pamilya para mas makakain nang maayos. Ayon sa survey nitong Marso 2025, bumaba ng 7.2% ang bilang ng nagugutom na benepisyaryo. Pinakamalaking pagbaba ay sa BARMM-Plus, kung saan bumaba ng 17.4% ang gutom.
Sinabi ni Secretary Rex Gatchalian na plano pang palawakin ang programa para umabot sa 600,000 pamilya ngayong ikalawang kalahati ng taon. Mula Oktubre 2024 hanggang Marso 2025, tuloy-tuloy ang pagbaba ng gutom sa mga rehiyon na sakop ng programa.
Bawat pamilya sa ilalim ng WGP ay nakakatanggap ng ₱3,000 food credits kada buwan gamit ang Electronic Benefit Transfer card, na pwede ipambili sa mga partner stores. Kasama dito ang 639 women-led enterprises mula sa mahigit 1,000 accredited retailers.
Maraming benepisyaryo mula Tondo, Maynila ang nagbahagi ng kanilang kwento. Isa sa kanila, si Edwin Jimeno, ikinuwento na dati ang pamilya niya ay kumakain lang ng pagpag at minsan dalawang beses lang sa isang araw. Ngayon, malaking ginhawa ang dala ng programa.
Layunin ng Walang Gutom 2027 na tuluyang makapagbigay ng sapat na pagkain sa 750,000 food-poor families pagsapit ng 2027. Bukod sa ayuda, tinuturuan din ang mga pamilya kung paano maghanda ng masustansya at abot-kayang pagkain.
