Ang bangkay ng lalaki ay natagpuan sa isang hotel sa Cubao, Quezon City noong Huwebes ng gabi, Agosto 28, 2025. Ayon sa pulisya, ang biktima ay duguan at nakagapos ang kamay at paa nang madiskubre bandang alas-8 ng gabi.
Sa inisyal na ulat, ang lalaki na tinatayang 30 hanggang 35 taong gulang ay nag-check-in pa noong Miyerkules ng gabi. Kinabukasan, nang oras na ng check-out, kumatok ang staff ngunit hindi na ito sumasagot. Gamit ang master key, binuksan ang pinto at doon na nakita ang bangkay malapit sa banyo.
Ayon kay Police Lieutenant Jaevon Ulysses Marigondon ng Cubao Police, nagkalat ang gamit sa loob ng kuwarto at may natagpuang drug paraphernalia sa kama. Patuloy na iniimbestigahan kung sino ang responsable sa krimen at sinusuri na rin ang mga CCTV sa paligid.
Dakong 1:48 ng madaling araw nitong Agosto 29, dinala ang labi ng biktima sa punerarya para sa posibleng autopsy. Nangako ang pulisya na sisiguruhin ang hustisya para sa insidente.
