Ang Gilas Pilipinas ay tuluyan nang natanggal sa laban matapos matalo sa defending champion na Australia, 60-84, sa quarterfinals ng FIBA Asia Cup 2025 na ginanap sa King Abdullah Sports City sa Jeddah, Saudi Arabia.
Mainit ang simula ng Australia na agad kumamada ng maraming three-pointers — tatlo mula kay Jaylin Galloway at dalawa mula kay Jack McVeigh — para sa 29-12 na kalamangan. Sa second quarter, lalo pang lumaki ang lamang sa 20 puntos at nagtapos ang first half sa 48-28 pabor sa Australia.
Hindi na nakabawi ang Gilas sa second half habang patuloy na pinatatag ng Australia ang kanilang depensa at opensa. Nanguna si Kevin Quiambao para sa Gilas na may 17 puntos (kasama ang apat na tres) at apat na rebounds. Si Dwight Ramos ay nag-ambag ng 15 puntos, pitong rebounds, at dalawang assists. May 10 puntos at apat na rebounds si Justin Brownlee, habang may walong puntos at walong rebounds si AJ Edu.
Limang manlalaro ng Australia ang nagtala ng double digits, pinangunahan ni Owen Foxwell na may 17 puntos. Sa shooting department, lamang ang Australia na may 43-32 edge sa field goals at 36.6% sa three-point shots. Sa rebound battle, 57 ang nakuha ng Australia kumpara sa 36 ng Gilas.
Sa kabila ng pagkatalo, magandang kampanya pa rin ito para sa Gilas Pilipinas dahil nakapasok sila sa quarterfinals — mas mataas kaysa sa ika-siyam na pwesto na nakuha nila noong 2022 sa Jakarta, Indonesia, kung saan nabigo silang umabot sa quarterfinals matapos matalo sa Japan, 81-102.
