Ang tapang ng isang ina sa Davao City ay hinangaan matapos nitong isumbong sa pulisya ang kanyang sariling anak na nagtago ng aabot sa ₱1.5 milyon na halaga ng marijuana sa kanilang bahay.
Nasamsam ng mga pulis ang mahigit 1,000 gramo ng pinatuyong marijuana sa tahanan ng mag-ina sa Aplaya, Bunawan, Davao City. Ang operasyon ay isinagawa nitong Linggo matapos hilingin mismo ng ina na siyasatin ang kanilang bahay.
Kinilala ang suspek sa alyas na “Ariel”, na ngayon ay nasa kustodiya ng pulisya at nahaharap sa kasong paglabag sa Comprehensive Dangerous Drugs Act of 2002. Patuloy pang iniimbestigahan kung saan nagmula ang nakumpiskang droga.
Umani ng papuri mula sa publiko ang ginawa ng ina, na mas piniling ipahuli ang anak upang hindi na lumala ang sitwasyon at maputol ang koneksyon nito sa ilegal na gawain.
