Ang mga nakamaskarang magnanakaw ay tumangay ng halos P397,000 halaga ng mga sikat na Labubu dolls mula sa isang toy store sa La Puente, California. Nangyari ang insidente madaling-araw nitong Miyerkules sa isang tindahan na nasa 18 milya silangan ng Los Angeles.
Ayon sa pulisya, apat na suspek na naka-hoodie at mask ang nakitang pumasok sa tindahan base sa kuha ng CCTV. Makikita silang kumukuha ng mga kahon at naghalungkat ng mga paninda bago tuluyang umalis. Gumamit umano ang mga suspek ng isang ninakaw na Toyota Tacoma, na kalaunan ay nabawi rin ng mga awtoridad.
Ayon sa may-ari ng tindahan, kinuha ng mga magnanakaw ang lahat ng kanilang paninda at iniwan ang lugar na magulo. Nanawagan sila sa publiko na tulungan silang mahanap ang mga salarin. Patuloy pa ang imbestigasyon ng Los Angeles County Sheriff’s Department.
Ang Labubu ay isang karakter mula sa The Monsters toy series na kilala sa kakaibang disenyo at makukulay na hitsura. Karaniwang may presyo ito mula ₱600 hanggang halos ₱11,000 depende sa modelo. Sikat ito sa maraming kolektor at maging sa ilang kilalang personalidad sa Pilipinas at sa buong mundo.
