Ang tatlong barge na may lamang molasses ay na-stranded sa baybayin ng Barangay Talisay, Calaca City, Batangas noong Sabado. Ito ay dahil sa malalakas na alon at hanging habagat na dala ng Tropical Storm Crising. Hinihila sana ang mga barge ng dalawang tugboat pero naputol ang tali habang kumukuha ng silong sa lugar.
Ayon kay Commodore Geronimo Tuvilla ng Philippine Coast Guard, ligtas ang 21 crew members. Sinabi niyang malalaki ang alon at malakas ang hangin kaya tumirik sa dalampasigan ang mga barge.
Galing pa ang mga barge sa Negros, at may dala itong 13 toneladang molasses na ihahatid sana sa isang distillery sa Balayan. May konting tagas ng molasses, pero walang laman na fuel ang mga barge kaya hindi ito delikado.
Ipinaliwanag ni Tuvilla na organic ang molasses kaya hindi ito nakakapinsala sa kapaligiran. Tiningnan na rin ng marine environmental team at lokal na pamahalaan ang lugar para siguraduhin na ligtas ito.
Kapag gumanda ang panahon, sisimulan na ang rescue operation para hilahin at alisin ang mga barge sa pagkaka-stranded.
