Ang Gilas Pilipinas Women ay muling natalo sa FIBA Women’s Asia Cup 2025 matapos mabigo ang kanilang matinding comeback laban sa Japan. Bumagsak sila sa 0-2 na record matapos ang 85-82 na pagkatalo sa Shenzhen Sports Center nitong Lunes.
Bagamat umarangkada ng 18-0 run sa huling bahagi ng laro, kinapos pa rin ang Pilipinas. Nanguna si Jack Animam sa opensa ng Gilas sa kanyang 24 points at 14 rebounds, habang tumulong din sina Vanessa de Jesus (13 pts), Naomi Panganiban (13 pts), at Sumayah Sugapong (12 pts).
Mula sa 21 puntos na kalamangan ng Japan, nabawasan ito ng Gilas sa natitirang limang minuto ng laro. Sa tulong nina De Jesus, Animam, Surada, at Panganiban, naibaba nila ang lamang hanggang sa tatlong puntos.
Sa huli, hindi pumasok ang tres ni Kacey Dela Rosa na sana’y nakatabla sa laro. Buzzer-beater man ang tira ni De Jesus, hindi ito naging sapat para mahabol ang Japan.
Ang Gilas ay susubok makakuha ng panalo sa susunod nilang laban kontra Lebanon sa Miyerkules, Hulyo 16, 1:30 p.m. upang maiwasang matapos ang group stage na walang panalo.
