Ang 19-anyos na estudyante na si Sophia Marie G. Coquilla mula sa University of the Philippines ay natagpuang wala nang buhay sa kanilang bahay sa Tagum City noong umaga ng Hulyo 9, 2025. Ayon sa ulat, si Sophia ay pinagsasaksak ng 38 beses, na sa unang bilang ay 20 lamang. Sa masusing imbestigasyon, nakita ang matinding galit sa likod ng pagpatay.
Pwersahang pinasok ang bahay nila Sophia. Nawawala ang ilang gamit tulad ng laptop, iPad, relo, at cellphone. Ayon sa pulisya at SOCO, may mga kasangkapang natagpuan sa tabi ng katawan tulad ng dumbbell, grass cutter, duguang panyo, at dalawang kutsilyo.
Dalawang menor de edad, edad 14 at 17, ang naaresto matapos ang insidente. Isa sa kanila ay nakita sa CCTV habang ang dalawa ay natagpuan sa isang boarding house sa lungsod. Nakuha sa kanila ang ilan sa mga ninakaw kay Sophia. Aminado rin silang may iba pa silang pinagnakawan bago ang insidenteng ito. Hinahanap pa rin ng pulisya ang dalawa pang suspek kabilang ang tinutukoy na "alias Roy."
Sa batas, ito ay pasok sa krimeng Robbery with Homicide batay sa Article 294 ng Revised Penal Code. Ibig sabihin, kahit nauna man ang pagnanakaw o pagpatay, basta’t may koneksyon ang dalawa, ay masasabing isang krimen ito. Malinaw ang mga ebidensya: pwersahang pasok, pagnanakaw, at marahas na pagpatay.
Dahil mga menor de edad ang ilang sangkot, papasok dito ang Juvenile Justice and Welfare Act. Pero kung mapapatunayang may discernment o pagkaunawa sa ginawa, lalo na ang 17-anyos, maaari siyang kasuhan at hatulan ng naaayon sa batas. Naniniwala rin ang awtoridad na may mas matatandang kasabwat sa likod ng krimeng ito.
Isang matalino at mabait na dalaga si Sophia, may pangarap at kinabukasan. Ang kanyang pamilya, kaibigan, at komunidad ay humihingi ng katarungan. Hindi lang ito simpleng pagnanakaw—isa itong malupit at planadong krimen. Nawa’y makamit ang buong katotohanan at hustisya para kay Sophia.
