Ang unang sulyap sa Philippine adaptation ng It's Okay to Not Be Okay ay inilabas na ng Netflix nitong Huwebes, kung saan tampok sina Anne Curtis bilang Emilia Hernandez at Joshua Garcia bilang Patrick Gonzales. Kitang-kita ang kanilang chemistry sa unang larawan ng serye.
Batay ito sa sikat na Korean drama na may parehong pamagat. Kwento ito ng isang author na may matinding antisocial behavior na natutong harapin ang kanyang emosyonal na sugat matapos makilala ang isang lalaking kayang baguhin ang malamig niyang pagkatao.
Ayon sa creative producer na si Henry King Quitain, ang kwento ay binigyan ng Filipino touch. "Gagawin nating Filipino 'yung Korean series," aniya. May mga pagbabago rin sa ilang bahagi ng kwento upang mas maging relatable sa mga Pinoy.
Gamit din sa palabas ang mga animated scenes na gawa ng Filipino animators, lalo na sa mga eksena na nagpapakita ng mga children’s books ni Emilia, na katulad sa orihinal na karakter na si Ko Moon-young.
Ang It's Okay to Not Be Okay Pinoy remake ay mula sa Star Creatives at mapapanood na simula Hulyo 18 sa Netflix.
