Ang isang 50-anyos na negosyante ay patay matapos barilin sa Barangay Commonwealth, Quezon City noong Lunes ng gabi. Ayon kay Kagawad Elmer Buena, tumawag ang isang residente matapos makarinig ng magkakasunod na putok ng baril. Pagdating nila sa lugar, nakita nilang nakabulagta at duguan na ang biktima.
May dalawang tama ng bala sa ulo ang biktima at nakita rin ang mga basyo ng bala sa paligid. Kinumpirma ng mga rumespondeng opisyal na wala nang pulso ang babae nang kanilang makita.
Sa imbestigasyon, napag-alaman na galing ang biktima sa kanyang tindahan sa palengke. May mga saksi na nagsabing sinundan ito ng isang lalaki at bigla na lang binaril habang naglalakad.
Ayon sa mga kapitbahay, ang biktima ay isang negosyante na nagpapautang, ngunit wala silang nabanggit na kaaway o natanggap na banta sa buhay nito. Dahil sa insidente, mas hinihigpitan na ang seguridad sa barangay.
Patuloy ang imbestigasyon ng mga awtoridad at kasalukuyang nagsasagawa ng follow-up operation ang pulisya para matukoy ang suspek.
