Ang Russian-American na vlogger na si Vitaly Zdorovetskiy ay nakapagpiyansa matapos ang pagkakaaresto sa Pasay City dahil sa pananakit at pangha-harass ng mga Pilipino para sa content. Kahit nakapagpiyansa na, ibinalik pa rin siya sa custody ng Bureau of Immigration (BI).
May kinakaharap siyang kaso gaya ng unjust vexation sa Regional Trial Court Branch 153 sa Taguig. Noong June 11, dinala si Vitaly sa Bureau of Jail Management and Penology (BJMP). Pinayagan siyang magpiyansa noong June 18, at agad siyang ibinalik sa pasilidad ng BI sa Camp Bagong Diwa.
Ayon kay BI Commissioner Joel Anthony Viado, hindi pa rin siya pwedeng makalaya kahit may piyansa. “May deportation case siya, kaya kahit makapagpiyansa sa mga lokal na kaso, ibabalik pa rin siya sa BI,” sabi niya. Tinawag din siyang isang undesirable alien kaya hindi ito pwedeng gumala.
Humingi si Vitaly ng temporary liberty, at sinabing hindi siya tatakas at mananatili lang daw sa NCR. Pero ayon kay Viado, hindi siya ide-deport hangga’t hindi natatapos ang mga kaso at parusang kakaharapin niya dito sa bansa.
Naaresto si Vitaly noong April 2 sa harap ng isang hotel sa Pasay. Sa isang video niya sa Kick na may pamagat na "Vitaly disturbing the peace in the Philippines", makikitang nanggulo siya sa mga tao sa BGC, sumakay ng patrol motorcycle, kinuha ang cap ng guard, at nangharang ng mga tao. Kinuhaan niya pa ng video ang guard kahit tumutol ito at kumanta pa ng “Paparazzi” ni Lady Gaga habang nang-aasar. Sa iba pa niyang stunts, nagnakaw siya ng electric fan at nasagi ang isang pasahero habang nagmamaneho ng tricycle.
