Ang bagong pag-aaral ng Reuters Institute ay nagsabi na maraming Pilipino ang interesado sa lokal na balita, pero karamihan sa kanila ay hindi ito kinukuha mula sa mga news publisher. Sa halip, mas pinipili nila ang social media bilang pangunahing source ng impormasyon.
Ayon sa datos, apat sa bawat sampung Pilipino ang "sobrang interesado" sa lokal na balita. Kapag isinama ang "medyo interesado", umaabot ito sa 84% — isa ito sa pinakamataas sa buong Asia-Pacific. Mas mataas pa ito kumpara sa Singapore, Japan, at Thailand.
Mas maraming Pilipino rin ang nakabasa o nakapanood ng lokal na balita sa nakaraang linggo kumpara sa global average. Halimbawa, 52% ang nagsabing sila’y nakabasa ng crime o aksidente news, at 42% naman ang tumutok sa lokal na pulitika — mas mataas ito sa global average na 32%.
Kahit mataas ang interest sa balita, mas pinipili pa rin ng karamihan ang social media kaysa sa traditional media tulad ng TV, radyo, o diyaryo. Halimbawa, 50% ng mga Pilipino ang nagsabing sa social media sila nakakakuha ng political news, habang 37% lang ang galing sa news outlet.
Dahil dito, nahihirapan ang mga lokal na pahayagan at news site na makakuha ng readers. Isa sa mga naapektuhan ay ang Baguio Midland Courier, na nagsara noong 2024 dahil sa taas ng gastos at kakulangan ng mambabasa. Nauna na rin nagsara ang Sunstar Baguio noong 2021.
