Ang 105-anyos na si Lola Rosalina “Apong” Corpuz Dela Rosa ay nasawi matapos masagasaan at makaladkad sa Barangay Wawa, Abra de Ilog, Occidental Mindoro. Ayon sa pamilya, kakaselebra pa lamang ng kaarawan ni Apong noong Hunyo 11, 2025.
Nangyari ang insidente bandang alas-12 ng hatinggabi. Ayon sa kanyang manugang na si Marilou Dela Rosa, nagising ang kapatid nila sa malakas na tunog. Akala nila ay hayop ang nabangga, pero laking gulat nila nang makitang si Apong na ang nakahandusay sa kalsada.
Dead on the spot si Lola Rosalina at hindi na nagawang dalhin sa ospital. Wala ring nakakita kung anong uri ng sasakyan ang nakabangga sa kanya dahil madilim ang lugar at malalim na ang gabi nang mangyari ito.
Nananawagan ang pamilya ng biktima sa sinumang may alam sa insidente o ang mismong salarin na lumantad at panagutan ang kanilang ginawa. Ayon sa kanila, bagamat matanda na si Apong, hindi karapat-dapat ang ganitong klase ng pagpanaw.
Hiling din ng pamilya sa lokal na pamahalaan na maglagay ng street lights sa kanilang lugar upang maiwasan na maulit ang ganitong trahedya.
