Ang kaso ng HIV sa Pilipinas ay tumaas nang napakalaki, umaabot na sa 500% ang paglobo nito. Ayon sa Department of Health (DOH), may 40 hanggang 57 bagong kaso ng HIV na naitatala araw-araw. Karamihan sa mga bagong kaso ay mula sa mga kabataang edad 15 hanggang 25 taon, habang noon ay mas matatanda ang kadalasang naaapektuhan.
Nakababahala ang balita na ang pinakabatang naitala ay isang 12-anyos mula Palawan. Ayon kay DOH Secretary Teodoro Herbosa, ang Pilipinas ang may pinakamataas na bilang ng HIV sa Western Pacific Region, kaya’t mahalagang tutukan ang problemang ito.
Karamihan sa mga bagong kaso, mga lalaki na nakikipag-sex sa kapwa lalaki ang naitatala. Dahil dito, nananawagan ang DOH na ideklara ang HIV bilang isang national public health emergency upang mapabilis ang aksyon at proteksyon sa kalusugan ng publiko.
Patuloy ang DOH sa pagsubaybay at paghingi ng suporta upang mapigilan ang pagkalat ng HIV at mabigyan ng tamang impormasyon ang lahat, lalo na ang mga kabataan.
