Ang apat na lalaki ay naaresto matapos umanong mangholdap sa Barangay Bel-Air, Makati nitong May 29 ng gabi. Ayon sa pulisya, nagpanggap silang mga riders ng isang ride-hailing app para makapangbiktima ng mga taong nag-o-overtime o lumalabas ng late mula sa mga opisina.
Lumapit sa pulis ang isang 29-anyos na vendor mula Gen. Luna Street at isinumbong na tinutukan siya ng baril at ninakawan ng cellphone at gamit ng apat na lalaki—isa sa kanila ay naka-uniporme ng ride-hailing driver, habang ang iba ay naka-itim.
Agad nagsagawa ng hot pursuit operation ang mga awtoridad at nahabol ang mga suspek sa may Valero Street. Habang tinatakasan nila ang pulis, hinabol sila hanggang sa sila ay mahuli malapit sa Sedeño Street.
Ayon kay Col. Jean Dela Torre, acting police chief ng Makati, may pattern umano ang galaw ng mga suspek—paikot-ikot sa lugar habang may distansya sa isa’t isa, tila nagmamanman ng biktima. Target daw nila ang mga lumalabas sa opisina ng dis-oras ng gabi.
Narekober mula sa kanila ang ninakaw na cellphone, isang baril na may binurang serial number, isang pekeng baril, granada, ilang patalim, at mga uniporme na ginamit bilang disguise. Lumalabas na miyembro sila ng Batang City Jail gang, at may mga record na ng pagnanakaw, droga, at sugal.
