Ang Aurora Pacific Economic Zone and Freeport Authority (APECO) ay opisyal nang nag-anunsyo ng pagkansela ng ASRV Special Resident Visa program sa Pilipinas. Aabot sa 689 na dayuhan ang apektado at maaaring magkaroon ng legal na problema dahil dito. Ang listahan ng mga visa holders ay naipasa na sa Bureau of Immigration para sa susunod na proseso.
Ayon kay APECO CEO Gil Gianan Taway IV, walang legal na basehan mula pa sa simula ang ASRV visa program dahil walang kapangyarihan ang APECO na magbigay ng permanenteng visa. Nakita rin nilang maraming aplikasyon ang kulang sa mga mahahalagang dokumento tulad ng address at NBI clearance.
Simula Abril 2025, unti-unting ipapadala ang mga cancelation notice sa mga may hawak ng visa. Posibleng mapababa ang visa status, maabisuhan na umalis, o mapatalsik kung may kriminal na kaso o pekeng dokumento. Kasabay nito, rerepasuhin din ang mga investor at work visas para matiyak ang tamang pamumuhunan.
