Ang 11 Pilipino kasama ang 4 na iba pang Asyano ay hinatulan ng korte sa Nigeria dahil sa online scam at cyber-terrorism, ayon sa ulat ng Economic and Financial Crimes Commission (EFCC). Kasama rin sa grupo ang dalawang Chinese, isang Malaysian, at isang Indonesian.
Umamin sa kasalanan ang mga sangkot at pinatawan ng isang taong pagkakakulong at multang isang milyong naira bawat isa, na katumbas ng humigit-kumulang ₱37,000. Ayon sa tagapagsalita ng EFCC na si Dele Oyewale, bahagi sila ng sindikatong gumagamit ng internet para manloko.
Inakusahan ang grupo na nagre-recruit ng mga kabataang Nigerian upang gamitin sa identity theft at online impersonation. Karaniwan itong ginagawa ng tinatawag na "Yahoo Boys", na kilala sa online scams.
Kinuha ng gobyerno ng Nigeria ang lahat ng electronic device na nakuha mula sa mga suspek. Bahagi ito ng mas malawak na kampanya ng bansa laban sa mga banyagang sindikato ng cybercrime.
Target umano ng mga scam ang mga biktima mula sa Amerika, Canada, Mexico, at Europa. Patuloy ang pagsusumikap ng mga awtoridad ng Nigeria na durugin ang ganitong uri ng panloloko online.
