Ang 20-anyos na si Alex Eala ay nakatakdang gumawa ng kasaysayan sa darating na French Open 2025 sa Paris, France. Siya ang unang Pilipinong tennis player, babae man o lalaki, na makakapasok sa singles main draw ng Grand Slam sa Open era ng tennis.
Makakaharap ni Eala si Emiliana Arango ng Colombia sa unang round ng palaro sa Roland-Garros ngayong Linggo, Mayo 25. Bagama’t mas mataas ang ranggo ni Eala bilang world No. 69, hindi ito garantiya ng panalo dahil magaling din ang kalaban.
Ang Open era ng tennis ay nagsimula noong 1968, kung saan pinayagan nang maglaban ang mga professional at amateur players. Mula noon, naging mas pantay ang labanan sa mga torneo gaya ng Grand Slam.
Si Arango, ang world No. 88, ay may magandang rekord ngayong taon. Nanalo siya ng WTA 125 Cancun Tennis Open at umabot sa finals ng WTA 500 Merida Akron Open matapos manalo sa qualifying rounds. Natalo lang siya kay world No. 9 Emma Navarro sa championship match.
Bagamat hindi seeded, si Arango ay patunay na kayang lumaban kahit dehado. Kaya naman, kailangang magpakita ng galing si Eala sa kanyang unang Grand Slam appearance para makuha ang panalo at maipagmalaki ang bandilang Pilipino.
