Isang bagong silang na sanggol ang natagpuang abandonado sa tabi ng sapa sa Ramon, Isabela noong umaga ng Lunes, Pebrero 23. Ayon sa ulat ng mga awtoridad, nakita ang sanggol sa bahagi ng Macaniao Creek sa Barangay Ambatali, na agad nagdulot ng pagkabigla at pag-aalala sa komunidad.
Unang napansin ng isang residente ang isang palanggana na nakapatong sa concrete barrier malapit sa sapa. Nang kaniyang usisain ang laman nito, tumambad ang isang lalaking sanggol na nakabalot lamang sa itim na pillow case. Kaagad niya itong iniulat sa opisyal ng barangay, na siyang tumawag sa pulisya para sa agarang responde.
Batay sa paunang pagsusuri, lumalabas na bagong silang ang sanggol dahil nakakabit pa ang talimpusod o umbilical cord nito. Agad namang dinala ang sanggol sa Rural Health Unit upang mabigyan ng kinakailangang atensyong medikal at masiguro ang kalagayan nito.
Sa kasalukuyan, patuloy ang imbestigasyon ng pulisya upang matukoy ang mga magulang at ang responsable sa pag-abandona sa sanggol. Nanawagan ang mga awtoridad sa sinumang may impormasyon na makipag-ugnayan sa pinakamalapit na himpilan ng pulisya upang mabigyang-linaw ang insidenteng ito.
