Opisyal nang ilalabas ni Belle Mariano ang kanyang bagong album na “Like U.” Ito ang pinakabagong proyekto ng Filipino actress-singer at ang kanyang unang koleksiyon ng mga kanta mula nang ilabas ang Believe noong 2024. Sa muling pagbabalik niya sa music scene, inaasahang magpapakita siya ng mas mature at evolved na tunog na tiyak na aabangan ng kanyang mga tagahanga.
Ang album na “Like U.” ay nakatakdang ilabas ngayong Pebrero 20, 2026, alas-12:00 ng madaling araw (PHT) sa ilalim ng Star Music. Binubuo ito ng walong track, kabilang ang “The Puzzle,” “Makulay,” “Numbers Of Love,” “Pintuan,” “Like You,” “Magdadala,” “Get Out,” at “Nowhere, Now Here.” Ipinapakita ng tracklist ang kombinasyon ng hugot, kilig, at empowering vibes na naging tatak na rin ng singer.
Itinuturing ang “Like U.” bilang unang original release ni Belle ngayong 2026. Kasunod ito ng remix ng kantang “Wala? Nandiyan” na kanyang nakasama sina Trisha Denise at Cesca na inilabas noong Enero 30, 2026. Sa bawat proyekto, mas pinagtitibay ni Belle ang kanyang pangalan hindi lamang bilang aktres kundi bilang isang seryoso at versatile na recording artist.
Samantala, bukod sa musika, patuloy rin ang pag-usbong ng kanyang karera sa pelikula. Muli siyang makakasama ni Donny Pangilinan sa pelikulang “Tayo Sa Wakas,” sa direksyon ni Cathy Garcia-Sampana. Ito ang kanilang unang feature film bilang tambalang kilala sa tawag na DonBelle mula noong 2022. Sa dami ng proyektong nakahanay, malinaw na 2026 ay isang malaking taon para kay Belle Mariano—sa musika man o sa pelikula.
