Mas madaling makakakuha ng electricity subsidies ang mga low-income at marginalized na pamilya simula ngayong buwan, ayon kay President Marcos. Sa isang event sa Meralco Theater sa Ortigas, Pasig, binigyang-diin ng Pangulo na ang tulong ng gobyerno ay dapat dumarating mismo sa mga Pilipino.
Ayon kay Marcos, ipatutupad ngayong buwan ang automatic registration ng lahat ng 4Ps beneficiaries sa Lifeline Rate Subsidy Program (LRSP). “Hindi dapat ang Pilipino ang humihingi ng tulong. Ang tulong ang dapat dumating sa Pilipino,” ani Marcos. Ipinunto niya na matagal nang hindi ganap na nagagamit ang LRSP dahil sa kumplikadong requirements.
Sa kasalukuyan, mahigit 334,000 lamang sa halos 3 milyong 4Ps beneficiaries ang nakarehistro sa LRSP. Sa bagong patakaran, ang mga 4Ps beneficiaries na may buwanang konsumo ng kuryente na 50 kilowatt-hour (kWh) o mas mababa ay makakakuha ng 100% discount. Para sa mga low-income families na hindi kabilang sa 4Ps pero pasok sa poverty threshold at may minimal na konsumo ng kuryente, puwede ring magrehistro sa LRSP.
Pinasimple rin ang proseso ng net-metering program para sa mas mabilis na pag-install ng solar panels at pagbenta ng sobrang kuryente sa grid. Ayon kay Marcos, mas malinaw na ang patakaran at mas mabilis na ang proseso, at patuloy na makikipagtulungan ang gobyerno at pribadong sektor upang maging abordable, accessible, at reliable ang kuryente.
Sa kanyang pananalita, pinuri ng Pangulo ang mga stakeholder tulad ng Meralco para sa kanilang mga hakbang sa pagpapalawak ng electrification, pagtaas ng kapasidad, at pagbibigay ng abot-kayang kuryente sa maraming Pilipino. Kasama rito ang Terra Solar Project, electrification ng remote communities, at suporta sa net-metering at lifeline rate programs, na makakatulong sa maraming pamilya na magkaroon ng access sa enerhiya.