Isang German national ang naaresto matapos masabat ang tinatayang P55.38 milyong halaga ng shabu sa NAIA Terminal 3. Ayon sa Bureau of Customs – NAIA, naharang ang dayuhan sa arrival area noong Biyernes matapos makitaan ng kahina-hinalang imahe ang kanyang bagahe sa X-ray screening.
Dumating ang suspek mula sa connecting flight na nagmula sa Addis Ababa, Ethiopia. Sa masusing inspeksyon, nadiskubre ng mga examiner ang puting kristalinong substansya na nakatago sa isang false compartment ng maleta at maging sa loob ng dalawang inukit na Bibliya. Ang mga pakete ay balot sa maraming patong ng plastik at duct tape upang maitago ang nilalaman.
Tinatayang may kabuuang timbang na 8.145 kilo ang nakumpiskang kontrabando. Ayon sa paunang pagsusuri ng K9 units at isinagawang field testing, positibo ito sa methamphetamine hydrochloride o shabu. Agad na inaresto ang suspek at isinailalim sa imbestigasyon para sa paglabag sa Republic Act No. 9165 o Comprehensive Dangerous Drugs Act of 2002 at Republic Act No. 10863 o Customs Modernization and Tariff Act.
Ipinasa na ang mga ebidensya sa Philippine Drug Enforcement Agency (PDEA) para sa karagdagang pagsusuri at inquest proceedings. Binigyang-diin ng mga opisyal ng Bureau of Customs na patuloy nilang pinahihigpit ang border control measures sa pamamagitan ng makabagong teknolohiya, intelligence operations, at mas matibay na koordinasyon sa iba’t ibang ahensya ng pamahalaan.
Ayon sa pamunuan ng ahensya, malinaw ang kanilang mensahe: ang anumang pagtatangkang magpasok ng iligal na droga sa Pilipinas ay agad na matutukoy, masisita, at haharap sa kaukulang kaso. Ang insidenteng ito ay patunay ng pinaigting na kampanya laban sa droga sa mga pangunahing paliparan ng bansa.
