Isang content creator ang namatay matapos kumain ng devil crab, isang uri ng alimango na nakalalason, sa Barangay Luzviminda, Puerto Princesa City. Nakuha umano ng pamilya ni Emma Amit ang mga crab mula sa karagatan ng Sitio Tacduan noong February 4, ngunit hindi nila alam ang panganib nito.
Nakapag-vlog pa si Amit ng pagluluto ng mga nakuha nilang alimango sa dagat. Ayon kay Punong Barangay Laddy Gemang, "Kinuha nila ang crab sa laot at niluto noong gabi. Kinabukasan, niluto pa rin ang natirang crab—at isa pala doon ay devil crab."
Hindi lamang si Amit ang nakain ng delikadong alimango; pati ang kaibigan niya ay nakaranas ng sintomas. “Habang kumakain si Amit, dumating ang kanyang kaibigan mula Barangay Mangingisda at inalok ng pagkain. Nang kumain siya ng devil crab, namanhid ang bunganga niya at hindi na umulit kumain,” dagdag ni Gemang. Nadala pa sa pagamutan ang kaibigan ni Amit at naagapan ang pagkalason.
Si Amit naman ay nawalan ng malay at isinugod sa ospital ngunit hindi na nailigtas at namatay noong February 6. Ayon sa barangay, pitong talukap ng devil crab ang nakita sa basurahan ng pamilya. Ito na raw ang ikatlong kaso ng pagkalason sa kanilang lugar dahil sa parehong uri ng crab.
Pinayuhan ng barangay at ng Bureau of Fisheries and Aquatic Resources (BFAR) ang lahat na iwasan ang devil crab dahil sa taglay nitong nakamamatay na lason. Ilan sa sintomas ng pagkalason ay pamamanhid ng dila at bibig, hirap sa paghinga, pagsusuka, pagkahilo, pagtatae, at pagkamatay. Agad na pumunta sa pinakamalapit na pagamutan kung maranasan ang ganitong sintomas.
