Nanawagan si Senador Joseph Victor “JV” Ejercito ng isang pormal na imbestigasyon kaugnay ng BOSS Ironman Motorcycle Challenge Mindanao Cup, na ginanap noong Enero 30 hanggang Pebrero 1, 2026. Layunin ng hakbang na ito na suriin ang mga pamantayan sa kaligtasan at ang pagpapatupad ng mga alituntunin sa mga endurance ride na may kaugnayan sa motorcycle tourism.
Sa inihain niyang resolusyon, inatasan ang Senate Committee on Tourism na magsagawa ng inquiry in aid of legislation upang tiyakin ang proteksyon ng mga kalahok at ng publiko, habang isinusulong ang domestic tourism. Binibigyang-diin dito ang kahalagahan ng malinaw na safety standards at mahigpit na enforcement protocols sa mga ganitong aktibidad.
Ayon kay Sen. JV Ejercito, ang mga aksidente sa kalsada na kinasangkutan ng ilang kalahok ay maaaring naiwasan kung ang aktibidad ay isinagawa bilang isang tunay at responsable na motorcycle tourism event. Ipinunto niya ang pangangailangang balansehin ang sigla ng turismo at ang kaligtasan sa lansangan.
Samantala, naglabas ang Land Transportation Office (LTO) ng Show Cause Order laban sa organizer, matapos ang mga ulat ng maramihang banggaan, kabilang ang isang nakamamatay na insidente, at ang umano’y paglabag sa traffic laws ng ilang kalahok na naitala sa mga larawan at bidyo.
Binigyang-diin ng LTO na sa ilalim ng Republic Act No. 4136, may legal at moral na obligasyon ang mga organizer na tiyakin ang road safety sa lahat ng oras. Ang isyung ito, ayon sa ahensya, ay malinaw na paalala na ang kaligtasan ay hindi maaaring isantabi sa anumang pribadong motor vehicle event.
