Natagpuang patay ang isang policewoman sa Bulacan matapos siyang mawala nang mahigit isang linggo, habang patuloy pa ring hinahanap ang kanyang walong taong gulang na anak. Isang person of interest ang kasalukuyang nasa kustodiya ng mga awtoridad habang masusing inaalam ang motibo sa likod ng krimen.
Ayon sa ulat ng pulisya, nadiskubre ang bangkay ng biktima bandang alas-3:30 ng hapon sa isang sapa sa kahabaan ng Pulilan–Baliuag Bypass Road sa Barangay Dulong Malabon. Nabatid na mga opisyal ng barangay ang nag-ulat sa mga awtoridad matapos makaramdam ng masangsang na amoy sa lugar. Ang katawan ay nakabalot sa tela, itim na garbage bag, at plastik, at nasa advance na estado ng pagkabulok.
Kinilala ang biktima bilang isang policewoman na nakatalaga sa Regional Personnel and Records Management Division. Siya ay positibong kinilala ng kanyang asawa at kapatid batay sa mga tattoo at suot na damit. Huling nakita ang biktima noong Enero 16, kasama ang kanyang anak, bago iniulat na nawawala noong Enero 19. Sa kasalukuyan, bumuo na ng Special Investigation Task Group (SITG) ang mga awtoridad upang pabilisin ang imbestigasyon, habang patuloy ang backtracking ng CCTV footage at ang masinsing paghahanap sa nawawalang bata.
