Matapos ang anim na taong preventive detention, hinatulan ng Tacloban Regional Trial Court sina Frenchie Mae Cumpio, isang mamamahayag, at Marielle Domequil, isang lay worker, kaugnay ng kasong terrorism financing. Ipinataw ng hukuman ang hatol na 12 hanggang 18 taong pagkakakulong, habang sila ay pinawalang-sala sa kasong illegal possession of firearms. Ang desisyon ay agad na umani ng batikos mula sa mga grupong nagtatanggol ng karapatang pantao.
Batay sa desisyon ng korte, napatunayan umano ng prosekusyon ang lahat ng elementong kailangan sa paglabag sa Republic Act No. 10168, o Terrorism Financing Prevention and Suppression Act of 2012. Ayon sa hatol, ang dalawa ay hindi lamang umano kasabwat kundi direktang nagbigay ng pera at suplay, kabilang ang bala, sa mga miyembro ng CPP-NPA noong 2019—panahong ito ay itinuturing na umanong teroristang organisasyon sa ilalim ng batas.
Sa kabila nito, iginiit ng mga abogado at tagamasid na may seryosong isyu sa due process, lalo na’t may naunang desisyong pumabor sa mga akusado hinggil sa pagkakakumpiska ng umano’y ebidensya. Binibigyang-diin ng kaso ang mas malawak na usapin kung paano maaaring magamit o maabuso ang mga batas kontra-terorismo, at kung paano nito naaapektuhan ang malayang pamamahayag, adbokasiya, at gawaing sibiko sa bansa.
