Ipinatupad ng ilang local government units (LGU) ang Walang Pasok sa Enero 16, 2026 dahil sa masamang panahon na dulot ng Bagyong Ada. Ayon sa PAGASA, inaasahan ang malalakas na ulan at hangin na pinalalakas ng northeast monsoon at ng periphery ng bagyo, na maaaring magpatuloy hanggang Enero 17 kahit sa mga lugar na wala sa direktang daraanan ng sistema.
Bilang tugon, naglabas ng anunsyo ang iba’t ibang lugar para sa class suspensions. Sa Region V (Bicol Region), suspendido ang face-to-face classes sa Albay at Sorsogon sa lahat ng antas, pampubliko at pribado. Sa Camarines Sur, kanselado ang klase mula Kinder hanggang Grade 6 sa Bula, habang walang pasok sa lahat ng antas sa piling paaralan kabilang ang Caorasan High School, Itangon High School, at Sto. Niño Integrated School.
Sa Region VIII (Eastern Visayas), suspendido ang klase sa Eastern Samar sa lahat ng antas. Sa Biliran (Kawayan), walang pasok simula hapon ng Enero 15 hanggang sa susunod na abiso. Samantala, sa Catbalogan City, Samar, ipinatupad ang no face-to-face classes at paglipat sa alternative learning upang matiyak ang kaligtasan ng mga mag-aaral at guro. Patuloy ang pag-update ng mga anunsyo habang nagbabago ang lagay ng panahon.
