Sugatan ang isang driver ng pick-up truck matapos sumalpok sa mga poste sa E. Rodriguez Avenue, Barangay Dalig, Antipolo, Rizal nitong Miyerkoles ng gabi, Enero 14. Agad na rumesponde ang barangay pasado alas-11 ng gabi nang matanggap ang tawag ukol sa insidente.
Pagdating ng mga opisyal, nakita nilang wasak ang unahang bahagi ng pick-up truck at ang driver ay duguan. Ayon kay Raymundo Juico, Public Safety Officer ng Barangay Dalig, “Kung inyong makikita ang sasakyan, sobrang sira ng unahan at iisipin mo na patay na ang driver. Gumana naman ang airbag pero tumama pa rin ang mukha niya.”
Ayon sa imbestigasyon, lasing ang driver ng pick-up truck. Dagdag ni Juico, “Ayon sa saksi, siya’y nakainom.” Habang tinutunton ng mga pulis ang pangyayari, lumabas na nasagi ng pick-up truck ang isa pang sasakyan bago ito tumakas at sumalpok sa poste.
Sinabi ni Luis Capales, Public Safety Officer, na hinabol ng ibang sasakyan ang pick-up truck: “Galing ng Lico’s Park, nasagi na nila ang isa’t isa. Hinabol siya ng kotse hanggang sa narating nila rito. Siguro sa taranta niya, kaya bumangga siya sa poste.” Dahil sa insidente, hindi nadaanan ang kalsada ng dalawang oras matapos matumba ang dalawang poste at lumaylay ang mga kable ng telepono.
Dinala sa pagamutan ang driver habang nagpapatuloy ang imbestigasyon ng pulisya. Pinapayuhan ang mga motorista na maging maingat sa kalsada at iwasan ang pagmamaneho nang nakainom upang maiwasan ang aksidente.
