Ang ilang bahagi ng EDSA ay pansamantalang isasara mula Disyembre 28, 2025 hanggang Enero 5, 2026 dahil sa rehabilitation works ng Department of Public Works and Highways (DPWH) na sinimulan noong Bisperas ng Pasko. Pinapayuhan ang mga motorista na maghanda at gumamit ng alternatibong ruta dahil sa inaasahang matinding trapiko.
Para sa southbound, kabilang sa mga apektadong lugar ang mga bahagi malapit sa P. Celle Street, Park Avenue, Soleum Gas Station, FB Harrison, Taft Avenue, Victory Line Pasay Terminal, Ayala underpass, at piling bahagi sa San Lorenzo Village. Ang mga lane na maaapektuhan ay kinabibilangan ng 3rd lane, outer lane, at inner lane, depende sa lokasyon.
Sa northbound, isasagawa ang concrete reblocking sa mga lugar malapit sa Taft Avenue Extension, Hotel Sogo Pasay, Roxas Boulevard, FB Harrison, E. Rodriguez Street, Shell EDSA McKinley, Ayala underpass, Buendia Avenue Extension, Kalayaan Avenue, at Orense Street. May mga petsang tiyak kung aling lane ang maaapektuhan mula inner lane hanggang outer lane.
Kasabay ng reblocking, maglalagay din ang DPWH ng bagong asphalt overlay na may hiwalay na iskedyul para sa northbound at southbound. Karamihan sa mga gawain ay hindi sasaklaw sa bus lane, at isasagawa ang trabaho 24/7 mula 11:00 PM ng Dec. 24 hanggang 4:00 AM ng Jan. 5, 2026.
Ayon kay Public Works Secretary Vince Dizon, ang P6-bilyong EDSA rehabilitation project ay tatagal ng humigit-kumulang walong buwan. Layunin nitong palitan ang sirang pavement, pagandahin ang drainage, at gawing mas pedestrian-friendly ang EDSA para sa mga commuter.