Ang dating mayor ng Bamban, Tarlac na si Alice Guo ay hinatulang guilty sa qualified human trafficking. Ibinaba ng Pasig RTC Branch 167 ang life imprisonment sa kanya at sa pito pang kasamahan.
Ipinakita sa ruling na ang parusa kay Guo ay life imprisonment, isang hatol sa ilalim ng Special Laws na walang takdang haba ng sentensiya. Iniutos din ng korte na i-cancel ang rehistro ng mga kumpanyang Baofu Land, Hongsheng Gaming, at Zun Yuan Technology.
Kasama sa mga nahatulan sa organizing trafficking sina Jaimielyn Santos Cruz, Rachelle Malonzo Carreon, at Walter Wong Rong. Sa acts of trafficking, nahatulan sina Wang Weili, Wuli Dong, Nong Ding Chang, at Lang Xu Po. Walo naman sa mga akusado ang inabsuwelto, ayon sa PAOCC.
Lumabas ang kaso matapos matuklasan ang illegal POGO operations sa Bamban, kung saan daan-daang dayuhan at Pilipino ang pinilit gumawa ng online scam at bantaang pahirapan. Na-raid ang compound noong March 2024 matapos makatakas ang isang Vietnamese worker. Sa imbestigasyon, lumabas na si Guo ang presidente ng kumpanyang nagmamay-ari ng lugar.
Naaresto si Guo noong September 2024 sa Indonesia matapos tumakas. Noong June, nagpasya ang korte sa Maynila na siya ay Chinese citizen, kaya hindi dapat nakatakbo bilang mayor. Dahil sa lumalaking galit ng publiko, ipinagbawal ni President Ferdinand Marcos Jr. ang mga offshore gambling operations sa bansa.
