Ang pinsala ng Typhoon Tino sa Negros Occidental tumaas sa P1.98 bilyon. Kasama rito ang P1.39 bilyon sa mga kalsada at tulay, P172.84 milyon sa paaralan, P294.91 milyon sa pananim at hayop, P125.67 milyon sa pangingisda, at P449,000 sa kagamitang pang-agrikultura.
Umabot na sa 67 ang namatay sa Negros Occidental, habang 48 ang nawawala. Humiling si Gov. Eugenio Jose Lacson sa Malacañang na maglaan ng pondo para ayusin ang mga nasirang tulay at kalsada upang ma-access muli ang mga liblib na lugar.
Ayon kay DSWD Secretary Rex Gatchalian, ipinag-utos ng Presidente na mabigyan ng pansin ang lahat ng lugar na naapektuhan ng kalamidad. Nakapamahagi na ang DSWD ng 1.2 milyon na food boxes sa mga biktima, kasama ang 50,000 sa Negros Island.
Sa Pampanga, iniulat na umabot sa P222 milyon ang pinsala sa agrikultura dahil sa Super Typhoon Uwan. Pinakamalaking pinsala ang naranasan sa palay na aabot sa P48.63 milyon at naapektuhan ang 956 na magsasaka.
Sa Nueva Vizcaya, binuo ni Gov. Jose Gambito ang “Task Force Uwan” upang mabilis na maibalik ang imprastruktura, serbisyo, at kabuhayan ng mga pamilya. Magkakaroon ng mas maliit na grupo para sa mga partikular na gawain tulad ng pag-aayos ng kalsada at pagbibigay ng tulong medikal.
