Ang sunog ay sumiklab sa limang apartment units sa Violet Street, Barangay Pasong Tamo, Quezon City nitong Miyerkoles ng madaling araw. Nagsimula ang apoy bandang 2:00 AM at agad itinaas sa unang alarma. Mahigit 11 firetrucks ang rumesponde para apulahin ang apoy.
Nabalot ng makapal na usok ang isang tatlong palapag na apartment kung saan na-trap ang isang mag-anak. Nailigtas sa rooftop ang padre de pamilya na si Marianito Villa, isang senior citizen. Ayon sa kanya, agad niyang ginising ang kanyang asawa at anak. Sa huli, nailigtas din ang mag-ina sa ikatlong palapag malapit sa banyo. Pareho silang nahirapang huminga ngunit ngayon ay stable na ang kondisyon.
Hindi nakaligtas ang apat na alagang hayop ng pamilya Villa—tatlong pusa at isang aso. Ayon sa BFP, sa dulong apartment unit nagsimula ang apoy.
Hindi bababa sa limang pamilya ang apektado ng sunog. Pasado 3:00 AM idineklara ang fire out. Patuloy pang inaalam ang sanhi at kabuuang halaga ng pinsala na tinatayang aabot sa ₱500,000.
