Ang co-founder ng Oracle na si Larry Ellison ang bagong pinakamayamang tao sa mundo, matapos niyang lampasan si Elon Musk. Ayon sa ulat, umabot sa ₱23.1 trilyon (USD $393 bilyon) ang yaman ni Ellison, mas mataas kaysa kay Musk na may ₱22.6 trilyon (USD $385 bilyon).
Tumaas ang halaga ng Oracle stocks ng higit 40% matapos maglabas ng malakas na kita at magandang forecast para sa kanilang AI cloud business. Dahil dito, lumaki ang tiwala ng mga investors sa papel ng Oracle bilang pangunahing infrastructure provider para sa artificial intelligence.
Ang pagtaas ng kayamanan ni Ellison ay itinuturing na pinakamalaki sa isang araw na naitala sa index. Habang bumababa ang halaga ng Tesla at yaman ni Musk, patuloy naman ang pag-akyat ng Oracle sa merkado.
Ipinapakita ng pagbabagong ito na ang bagong gold rush sa tech industry ay hindi na lang nakasentro sa mga consumer products o social media, kundi sa AI infrastructure. Sa edad na 81, patunay ito ng matibay na impluwensiya ni Ellison at ng tagumpay ng Oracle sa modernong panahon.
