Ang PAGCOR ay plano nang gumamit ng artificial intelligence (AI) para makilala ang mga taong adik sa sugal at mga mandaraya sa lumalaking online gambling sa bansa.
Ayon kay Chairman Alejandro Tengco, nagsisimula na silang maghanap ng mga AI tools na makakatulong sa mas mahigpit na regulasyon. Isa sa mga gamit nito ay ang AI-powered e-KYC na kayang makita kung may peke o binago na ID. Sa ganitong paraan, mababawasan ang fraud at mapipigilan ang mga minor de edad na makapagrehistro.
Ipinaliwanag pa niya na kapag may nakita ang AI na delikadong asal sa pagsusugal, awtomatikong magkakaroon ng “cooling period.” Ihihinto muna ang account at maaari lang magpatuloy ang player kapag may maayos na dahilan at aprubado ng regulator.
Plano rin ng PAGCOR na gumamit ng AI na kayang subaybayan ang libo-libong galaw ng player sa real time. Dahil dito, mas madali nilang makikita ang mga panganib na pattern at maagapan bago lumala ang problema.
Samantala, hinihikayat din ang publiko na mag-report ng illegal online gambling at pekeng ads na lumalabas sa social media. Sa ganitong paraan, mas mapapalakas pa ang laban sa iligal na sugal at mapoprotektahan ang mga manlalaro.
