Ang mga pulis sa Dasmariñas, Cavite ay natunton at nakumpiska ang pulang kotse na ginamit ng suspect sa pamamaril sa isang Meralco technician sa Barangay Salitran 3.
Ayon sa ulat ng pulisya, bandang alas-7 ng umaga noong Biyernes, nakita ang inabandonang sasakyan sa Barangay Pasong Buaya 1, Imus City. Nakuha na rin ang pagkakakilanlan ng suspect at agad siyang kinasuhan ng murder sa City Prosecutor’s Office.
Ang narekober na sasakyan ay isasailalim sa forensic examination para sa imbestigasyon.
Matatandaan na noong Miyerkules, binaril ang 54-anyos na biktima habang sakay ng service vehicle ng Meralco sa Jose Abad Road. Nagsimula umano ang insidente nang magkasabitan sa daan ang service vehicle at ang pulang kotse ng suspect.
Nakaburol na ang biktima, habang tumanggi naman ang pamilya niyang magbigay ng pahayag.
