Ang Philippine Coast Guard (PCG) ay nag-ulat na mahigit 600 katao ang na-stranded sa ilang pantalan sa bansa dahil sa Bagyong Crising (Tropical Storm Wipha). Ayon sa ulat mula alas-4 ng madaling araw hanggang alas-8 ng umaga ng Hulyo 20, nasa 634 pasahero, truck driver, at cargo helper ang naapektuhan sa 37 pantalan.
Bukod dito, may 227 rolling cargoes, 33 barko, at 4 motorbanca na hindi pa rin makaalis. Samantala, may 45 barko at 90 motorbanca na pansamantalang nagkukubli o huminto sa ligtas na lugar.
Sa Eastern Visayas, pinakamalaki ang bilang ng mga na-stranded — 445 katao, kasama ang 210 rolling cargoes at 3 barko. Sa Western Visayas, nasa 125 katao ang hindi pa rin makaalis, habang sa Bicol, 60 katao at 15 rolling cargoes ang naapektuhan.
Sa Southern Visayas, may 13 barko at 4 motorbanca ang stranded, habang sa Southwestern Mindanao, may 11 barko at 2 rolling cargoes na naantala ang biyahe.
Sa National Capital Region at Central Luzon, may 3 barko na hindi makabiyahe at 15 barko at 50 motorbanca ang nagkukubli. Sa ibang bahagi tulad ng Palawan at Southern Tagalog, may ilang barko at motorbanca rin ang pansamantalang huminto sa operasyon.
