Ang Nike ay naglabas ng mas malinaw na preview ng kanilang bagong sapatos sa road running. Ang bagong Nike Vomero Premium at Vomero Plus ay dinisenyo para sa mas kumportableng takbuhan, gamit ang mga bagong teknolohiya tulad ng ReactX foam na mas responsive ng 13% at mas eco-friendly—bumababa ng 43% ang carbon emissions kumpara sa dating foam.
Ang Vomero Premium ay may pinakamataas na heel stack height sa Nike, nasa 55mm ito, may ZoomX midsole, at may Zoom Air units sa harap at likod. Resulta nito ay mas responsive at flexible ang bawat hakbang. Samantalang ang Vomero Plus naman ay gumagamit ng engineered mesh sa upper, may fit band sa midfoot, at may dagdag na foam padding sa collar at tongue para sa mas secure na fit.
Ang bagong lineup ay ilalabas ngayong Fall 2025. Una sa listahan ay ang Vomero Premium na darating sa October 2 sa ilang piling retailers, at susundan ng global release sa October 16. Layunin ng lineup na ito na gawing simple ang pagpili ng running shoes para sa lahat ng uri ng runner—mula sa naghahanap ng malambot na cushioning hanggang sa gustong mas responsive na ride.
Ang Vomero ang pinaka-soft sa tatlong pangunahing sapatos ng Nike, kasunod ang Pegasus na may balanseng cushioning at energy return, at ang Structure para sa mga nangangailangan ng suporta at stability. Lahat ng ito ay may tatlong bersyon: Icon, Plus, at Premium, na iba-iba ang teknolohiya para sa mas elevated na running experience.
Ayon kay Marian Dougherty, senior director ng Nike running footwear, “Alam naming gusto lang ng runners ng sapatos na swak sa kanilang daily runs. Hindi nila kailangang pag-isipan ng sobra. Kaya nilinaw namin ang bawat modelo para mas madaling pumili.”
