Ang dalawang Taiwanese na sina Liu Cheng-Chihi (31) at Tsai Chit Ting (41) ay naaresto sa Lapu-Lapu City, Cebu matapos silang mahuli habang nagpapatakbo ng isang online fraud syndicate kasama ang 29 na Pilipino. Ayon sa NBI Central Visayas, ang grupo ay sangkot sa love scam at pekeng e-commerce site, kung saan maraming biktima ang nabiktima sa paniningil ng bayad pero walang natanggap na produkto.
Ginamit ng grupo ang mga pekeng shopping websites na kamukha ng mga legit na sites tulad ng Shopee. Dahil hindi Cash on Delivery (COD) ang opsyon, napilitan ang mga biktima na magbayad ng buo sa una pa lang. Gamit rin ng sindikato ang mga dating apps at social media platforms gaya ng Facebook, WhatsApp, at Telegram para sa mga “romantic scam.”
Ayon kay Atty. Renan Oliva, director ng NBI Central Visayas, nag-ooperate na ang grupo ng halos isang taon at inilipat nila ang operasyon sa mga residential areas matapos ipagbawal ang mga POGOs. Nahuli sa akto ang mga suspek sa basement ng isang bahay, at nakumpiska ang mga cellphone, laptop, at iba pang electronic devices na ginagamit sa panloloko.
Kinasuhan ang mga suspek ng paglabag sa Section 4(b)(2) ng Anti-Cybercrime Act (RA 10175) — “Fraudulent Acts Involving Computers.” Kung mapatunayang nagkasala, posibleng makulong sila ng 6 hanggang 12 taon at magmulta ng hindi bababa sa ₱200,000.
Ang dalawang Taiwanese ay tinuturing na mga mastermind at on-site supervisor, habang ang 29 Pilipino ang nagsisilbing operator ng mga fraud activity. Kasalukuyang naka-detain ang mga dayuhan at inaalam pa kung may dati na silang kaso sa Pilipinas.
