Ang sikat na K-pop girl group na TWICE ay muling magbabalik sa Pilipinas ngayong Oktubre 4 bilang parte ng kanilang bagong world tour na pinamagatang "This Is For." Gaganapin ang concert sa Philippine Arena sa Bulacan, kung saan huling nagtanghal ang grupo noong 2023 para sa “Ready To Be” tour.
Inanunsyo ito ng TWICE sa kanilang social media accounts nitong Linggo ng gabi. Ibinahagi nila ang tour poster at isang teaser video na nagpapakita ng mga eksena mula sa kanilang mga nakaraang performance, kasabay ng tanong: "Ready? A new era begins."
Magsisimula ang tour sa Incheon, South Korea ngayong Hulyo, at susuportahan nito ang kanilang ika-apat na full-length album na ilalabas sa Hulyo 11. Pareho ang pangalan ng album at tour — This Is For.
Binuo noong 2015, ang TWICE ay binubuo nina Jihyo, Nayeon, Jeongyeon, Momo, Sana, Mina, Dahyun, Chaeyoung, at Tzuyu. Nakilala sila sa kanilang debut single na “Like Ooh-Ahh” at patuloy na namamayagpag sa K-pop world.
May higit 12 milyong followers sa X (dating Twitter), naging paborito ang TWICE sa buong mundo dahil sa kanilang mga catchy pop hits at energetic performances. Kaya mga Filipino ONCE, markahan na ang kalendaryo — dahil siguradong kasama kayo sa bagong era!
