Ang insidente ng tatlong lalaking umano'y tumira sa ilalim ng kanal sa Makati ay kasalukuyang iniimbestigahan ng mga awtoridad. Kumalat sa social media ang isang video na nagpapakitang may taong lumalabas sa drainage canal sa kanto ng V.A. Rufino at Adelantado Streets, Barangay San Lorenzo.
Base sa CCTV footage, nakita ang tatlong lalaki na sunod-sunod na pumasok sa kanal bandang alas-4 ng hapon noong Lunes. Sa paunang ulat ng Makati Police, kinilala silang mga palaboy mula sa Barangay Pio Del Pilar.
Sa loob ng kanal, nakita ang mga gamit gaya ng screwdriver, pliers, at wrench. Dahil dito, tinitingnan din ng pulisya ang posibilidad na may kinalaman ito sa kriminal na aktibidad.
Napag-alamang konektado ang kanal sa isang creek at posibleng may ugnayan sa drainage system ng Amorsolo Street.
Samantala, dumating din ang mga tauhan ng ‘Pag-abot Program’ ng DSWD para suriin ang kalagayan ng mga palaboy at magbigay ng tulong sa kanila.
