Patuloy ang Tesla sa pagpapalawak ng kanilang charging network sa Pilipinas sa pamamagitan ng opisyal na pagbubukas ng kanilang pinakabagong Supercharger hub sa Opus Mall, Quezon City.
Matatagpuan sa Level 3, Mezzanine 1, ang bagong lokasyon ay nagdadagdag sa kabuuang bilang ng Tesla EV chargers sa bansa: 4 Supercharging stations (16 Superchargers) at 6 Destination Charging stations (24 Wall Connectors).
Sa halagang ₱19 per kWh, na pinakamababa sa Metro Manila, at may maximum charging rate na 250 kW, ang V4 Tesla Superchargers ay dinisenyo para sa bilis at kahusayan, na nagbibigay-daan sa Model Y Premium Long Range RWD na makakuha ng hanggang 267 km ng range sa loob lamang ng 15 minuto.
Sa seremonya, dumalo ang mga executives mula sa Tesla at Robinsons Land Corporation, kabilang sina Isabel Fan, Senior Regional Director para sa HK, Macau & Southeast Asia, at Mr. Faraday D. Go, Executive Vice President; pati na rin sina Lucky Jay Damaso, Corporate Energy Head, at Joel Lumanlan, Vice President Head of Operations and Marketing.
Binibigyang-diin ni Fan na ang pagbubukas na ito ay simbolo ng transformative leap para sa Tesla at sa sangkatauhan. Ang inobasyon ng Tesla sa mobility at enerhiya ay naglalayong magbigay ng sustainable na kinabukasan para sa lahat, suportado ng kanilang Full Self-Driving (FSD) technology, matibay na charging network, at patuloy na over-the-air updates na nagpapahusay sa karanasan ng bawat driver.
Ang bagong hub ay nagpapakita rin ng pangako ng Tesla sa mas malapit na komunidad ng mga may-ari, sa pamamagitan ng Tesla Owners Club, na nagbibigay ng eksklusibong benepisyo at partner offers. Bukod sa mabilis na charging sa isa sa pinaka-premium na mall sa metro, maeenjoy din ng mga may-ari ang karagdagang perks sa pamimili at lifestyle habang nagcha-charge.
Sa bawat bagong lokasyon, pinapalakas ng Tesla ang kanilang misyon na gawing mas accessible, convenient, at enjoyable ang sustainable driving para sa lahat, pinagsasama ang makabagong teknolohiya, maaasahang infrastructure, at makabuluhang karanasan para sa customer.
