Nagiging mas buhay at masigla ang dining scene ng Newport World Resorts sa pagbubukas ng Brotzeit German Bier Bar and Restaurant sa plaza nito. Bagama’t indoor ang buong espasyo, may al fresco feel ang outdoor seating dahil sa bukas na disenyo ng plaza, habang bumabati naman sa loob ang isang beer bar na may iba’t ibang German beers on tap at mezzanine na maaaring ireserba para sa private events.
Dinadala ng Brotzeit ang tunay na Bavarian flavors sa pamamagitan ng kanilang mga signature dish. Tampok dito ang Schweinshaxe, isang crispy pork knuckle na binraise sa beer at inihaw, na kahawig ng crispy pata ngunit may mas malalim na European character. Kasama rin sa handog ang sausage platters at schnitzel, na sinasabay sa pretzels at sauerkraut para sa kumpletong karanasan.
Ipinasilip rin ang mga paparating na bagong putahe sa pamumuno ng culinary director na si Chef Ivan Maminta. Isa sa mga ito ang rollmops, isang European delicacy na binubuo ng pickled herring sa rye bread, na sasamahan ng roasted potatoes, bacon bits, beetroot salad, at fried egg sa final version nito.
Para naman sa mas hearty na panlasa, naroon ang Königsberger Klopse, mga meatballs at patatas na nilulunod sa creamy caper sauce. Dagdag karakter sa lugar ang isang glass cabinet na puno ng German beer steins, na maaaring bilhin at may kasamang 365 days of free beer sa branch kung saan ito nakuha.
Bukas araw-araw mula 11 a.m. hanggang 12 mn., matatagpuan ang Brotzeit sa ikalawang palapag ng Newport Mall. Pinagsasama nito ang authentic German cuisine, premium beers, at eleganteng ambiance, dahilan upang maging bagong paboritong tambayan ng mga food at beer enthusiasts.
