Ang dalawang security guard ay nasawi matapos umanong barilin ng kapwa nila guwardya sa loob ng isang car dealership sa Commonwealth Avenue, Quezon City, nitong Miyerkules ng hapon, ayon sa ulat ng ABS-CBN News.
Batay sa paunang imbestigasyon ng Quezon City Police District (QCPD), natutulog umano ang mga biktima habang naka-duty nang mangyari ang pamamaril. Bago ang insidente, sinabi pa raw ng suspek sa isang sales agent na mayroon siyang papatayin, ayon kay PMaj. Jennifer Gannaban, tagapagsalita ng QCPD.
Nang dumating ang mga pulis sa lugar, wala nang buhay ang dalawang biktima. Naiulat ang insidente bandang alas-2 ng hapon, ngunit lumalabas na nangyari ang pamamaril halos isang oras bago ito nai-report. Napag-alaman din na may naamoy na alak sa lugar, kaya sinisilip ng mga awtoridad ang posibilidad ng inuman o pagtitipon bago ang krimen.
Sa ngayon, wala pang malinaw na motibo ang pamamaril. Patuloy ang masusing imbestigasyon ng QCPD, kabilang ang pagkuha ng CCTV footage, pangangalap ng ebidensya, at panayam sa mga saksi, habang inilunsad na rin ang hot pursuit operation laban sa suspek. Wala namang ibang taong nadamay sa insidente.
