Ang dating kongresista na si Zaldy Co ay nagsabi noong Nobyembre 16 na binantaan daw siya ni Martin Romualdez dahil sa umano’y ₱100 bilyon na budget insertion at flood control corruption. Sa bagong video, sinabi ni Co na noong Marso 2025 pa lang ay nagparinig na raw si Romualdez na “papatayin” siya kung magsasalita siya tungkol sa isyu.
Ayon kay Co, may mga tawag pa raw si Romualdez kung saan sinabi umano na delikado siyang umuwi. Sinabi pa raw ng dating Speaker na baka may “rob out” o pag-atake na gawin sa kanya, o kaya raw ay ipapatay siya habang nasa kulungan.
Nag-iwan si Co ng mensahe sa video: umaasa raw siyang hindi siya mapatay bago niya mailabas ang lahat ng ebidensya. Hinimok din niya ang Ombudsman at Senado na imbestigahan si Romualdez at si Pangulong Ferdinand Marcos Jr. kapag naipasa niya ang mga dokumento.
Hindi diretsong sinagot ni Romualdez ang akusasyon. Sabi niya, wala siyang ginawang mali at tiwala siya na ang mga imbestigador ay susunod sa ebidensya. Hinikayat din ng Ombudsman si Co na magsumite ng sworn statement at hindi puro video.
Iginiit pa ni Co na mas malaki raw ang perang sangkot—hindi ₱21 bilyon kundi ₱56 bilyon, at sinabi niyang napunta raw ito kay Marcos at Romualdez, pero walang naipakitang dokumento. Mas nauna nang inakusahan ni Co ang dalawa tungkol sa utos daw na ₱100 bilyong insertion at paghahatid daw niya ng maleta ng pera. Mariin itong itinanggi nina Marcos at Romualdez.
