Ang korupsyon at mga ghost projects ang itinuturing na “tunay na horror stories” ngayong Halloween, ayon kay Gabriela Party List Representative Sarah Elago. Aniya, punong-puno ng “trick or treat” ang pamahalaan—trick para sa panlilinlang at treat para sa mga may sariling interes at kontraktor. Dagdag pa niya, ang tanging paraan para matigil ang “mga halimaw ng korupsyon” ay ang sama-samang pagkilos ng mga mamamayan.
Samantala, sinabi ni ACT Teachers Party List Representative Antonio Tinio na ngayong Undas, dapat matakot ang mga tiwaling opisyal dahil hindi titigil ang taumbayan sa panawagan para sa hustisya. Ayon sa kanya, “dapat kilabutan ang mga kurakot dahil hindi sila titigilan ng mamamayan.”
Sumang-ayon naman si Akbayan Party List Representative Percival Cendaña, na nagsabing ang “pinakamalaking multo” ay ang multo ng korupsyon. Ayon sa kanya, tumitindi na ang galit ng mga Pilipino sa mga tiwaling proyekto lalo na sa mga flood control projects. “Hindi magiging masaya ang Halloween ng mga halimaw ng korupsyon,” dagdag niya.
Ipinahayag din nina Tinio at Cendaña ang pagkadismaya dahil wala pang napapanagot sa mga isyu ng katiwalian. Giit nila, “inip is real,” dahil matagal na mula nang magpahayag ang Pangulo ngunit wala pa ring malinaw na resulta. Hinikayat nila ang Independent Commission for Infrastructure na ipakita ang bunga ng kanilang imbestigasyon sa lalong madaling panahon.
Sa usapin naman ng “no gift policy” tulad ng ipinatupad ni Naga City Mayor Leni Robredo, sumang-ayon si Elago na dapat itong ipatupad sa buong bansa. Ayon naman kay Cendaña, magkaiba si Robredo at ang kasalukuyang bise presidente dahil “wala si Leni ng mga confidential funds na hindi pa rin naipapaliwanag.”
