Ang BYD ay unti-unting nagbabago ng direksyon—mula sa pagiging full electric vehicle (EV) brand patungo sa pagtuon sa plug-in hybrid technology. Makikita ito hindi lang sa mga bagong modelong inilunsad sa Pilipinas, kundi pati sa ibang bansa. Isa na rito ang Atto 2, na unang inilabas bilang electric SUV, ngunit ngayon ay may Super DM-i hybrid powertrain na.
Inilabas noong unang bahagi ng 2025, ang Atto 2 DM-i ay patunay na gustong palakasin ng BYD ang sales nito sa buong mundo, lalo na sa Europe, kung saan mabilis ang paglago ng hybrid market. Tumaas ng halos 54.5% ang benta ng plug-in hybrids noong Agosto, kaya gusto rin ng BYD makisabay sa trend na ito.
Ang bagong Atto 2 DM-i ay may tinatayang 90 km electric range at hanggang 1,000 km combined range. Ayon sa ulat, posibleng gamitin nito ang kaparehong makina ng Seal 5 DM-i na may 179 hanggang 197 horsepower at 8.3 kWh hanggang 18.3 kWh battery capacity.
Upang maisama ang makina, binago rin ang disenyo ng SUV. May mas malaking grille para sa cooling system at bagong bumper design, habang inalis naman ang side vents.
Sa ngayon, maliit ang posibilidad na maglabas ang BYD Philippines ng Atto 2 DM-i dahil ginagawa na ng Sealion 5 DM-i ang parehong papel dito. Mas malaki ang tsansang ipadala na lang ang Atto 2 EV sa Pilipinas mula Europe. Kung mangyari ito, inaasahang magiging mas abot-kaya ito—posibleng nasa ₱1.8 milyon hanggang ₱2 milyon depende sa variant.
