Ang isang 25-anyos transwoman na negosyante ay nagreklamo laban sa isang Chinese national matapos ang umano'y insidenteng naganap sa isang resort sa Barangay Ligaya, Mabini, Batangas noong Sabado.
Ayon sa ulat ng pulisya sa Mabini, nagtungo si alyas "Larc", residente ng BF Resort Village, Las Piñas, upang ireklamo ang lalaking nakilala bilang Ehrron Sy, 23 anyos, isa ring negosyante.
Base sa paunang imbestigasyon, bandang ala-1:00 ng hapon, sinabihan umano ng suspek si Larc na ikakalat ang kanyang hubad na video sa social media kung hindi siya papayag sa isang personal na kahilingan.
Dahil dito, sinamahan siya ng kaibigan at nagtungo sila sa Blue Ribbon Resort para kausapin ang suspek at pakiusapang burahin ang naturang video. Ngunit hindi raw pinapasok ang kanyang kasama.
Pagpasok ni Larc sa silid, inireklamo niyang sapilitan siyang hinubaran at pinilit sa isang bagay na nagdulot ng matinding trauma. Patuloy pa ang imbestigasyon ng mga awtoridad sa insidente.
