Inilunsad ng Department of Education (DepEd) ang bagong polisiya na magbibigay ng limang araw na wellness leave sa lahat ng guro at non-teaching personnel sa buong bansa. Layunin ng hakbang na ito na palakasin ang mental health at pagandahin ang kondisyon sa trabaho sa sektor ng edukasyon.
Ayon kay Education Secretary Sonny Angara, saklaw ng benepisyong ito ang lahat ng eligible na kawani mula central office hanggang sa mga paaralan at community learning centers, anuman ang kanilang employment status. Ang leave na ito ay hiwalay sa vacation at sick leave at maaaring gamitin para sa mental health care, physical wellness activities, o simpleng pahinga.
Binanggit ni Angara na ang polisiya ay alinsunod sa direktiba ni Pangulo Ferdinand “Bongbong” Marcos Jr., na naglalayong itaguyod ang employee welfare bilang bahagi ng administrasyon. “Kapag inaalagaan natin ang ating mga guro at kawani, mas nagiging matatag ang ating mga paaralan at mas napapabuti ang kalidad ng edukasyon para sa ating mga mag-aaral,” dagdag niya.
Ayon sa DepEd Order No. 002, s. 2026, maaaring kunin ng mga kawani ang leave ng sunod-sunod hanggang tatlong araw o hiwalay na petsa sa loob ng taon. Kailangan ding mag-file ng aplikasyon limang araw bago gamitin, maliban sa emergency. Hindi rin ito cumulative at hindi maaaring gawing cash.
Ang polisiya ay nagtatakda rin na panatilihing kompidensiyal ang impormasyon tungkol sa mental health, alinsunod sa Data Privacy Act. Layunin ng hakbang na ito na bawasan ang absenteeism at turnover, habang lumilikha ng suportadong work environment para sa mga guro, na itinuturing na pamumuhunan sa kinabukasan ng kabataang Pilipino.
