Ang Department of the Interior and Local Government (DILG) ay nagsabi na maliit ang posibilidad na magkaroon ng protesta sa Pilipinas na katulad ng nangyari sa Nepal, kung saan nagkaroon ng sunog at matinding kaguluhan. Ayon kay Secretary Jonvic Remulla, ang mga Pilipino ay hindi nanununog ng gusali kahit sa pinakamalalang sitwasyon, pero handa pa rin ang gobyerno kung sakaling lumala ang kilos-protesta.
Sinabi ni Remulla na nagkaroon na ng command conference para ihanda ang mga contingency plan sa posibleng kilos-protesta laban sa korapsyon, matapos ang kaguluhan sa Indonesia at Nepal na nagresulta sa pagkamatay ng hindi bababa sa 19 tao. Aniya, "People want accountability but not instability," at nananatili sa maximum tolerance ang pamahalaan.
Dagdag pa niya, inutusan na ang pulisya na maging mahinahon, magpakita ng respeto, at sundin ang karapatan ng mamamayan sa malayang pagtitipon. "Hayaan na natin sila mag-protesta kung gusto nila, basta't mapayapa," ayon kay Remulla.
Samantala, tiniyak ng PNP na handa sila sa anumang posibleng kaguluhan, lalo na matapos ang mga alegasyon ng korapsyon sa flood control projects na mas malaki pa raw kaysa sa Napoles scam. Ayon kay Lt. Gen. Jose Melencio Nartatez Jr., may nakahandang security plan para sa crowd control at dispersal kung kinakailangan.
Sa ngayon, ilang grupo gaya ng Tindig Pilipinas, Nagkaisa, Kalipunan ng Kilusang Masa, at Siklab ang nagkilos-protesta sa EDSA Shrine para kondenahin ang umano’y bilyong pisong korapsyon sa mga proyekto ng flood control.
