Ang Department of Budget and Management (DBM) ay inaprubahan na ang karagdagang 4,000 bagong posisyon para sa mga guro ngayong school year. Ayon kay Budget Secretary Amenah Pangandaman, ito ay bahagi ng target ng gobyerno na makapag-hire ng kabuuang 20,000 guro ngayong taon.
Noong nakaraang buwan, 16,000 teaching positions na ang unang inaprubahan gamit ang P4.19 bilyong budget. Ang pangalawang batch ng pondo ay magmumula sa built-in budget ng Department of Education (DepEd) sa ilalim ng 2025 General Appropriations Act.
Lahat ng 4,000 na bagong posisyon ay para sa Teacher I level na may Salary Grade 11, o sahod na P27,000 pataas kada buwan. Sa bilang na ito, 1,951 ay para sa senior high school, 1,658 para sa kindergarten at elementarya, at 391 para sa junior high school.
Ayon kay Pangandaman, ang hakbang na ito ay alinsunod sa utos ni Pangulong Marcos na palakasin ang sektor ng edukasyon at tiyaking sapat ang mga guro sa mga pampublikong paaralan. Kamakailan lang, iniulat ng DepEd na 27.6 milyong estudyante ang bumalik sa klase.
Sa hiwalay na ulat ng Department of the Interior and Local Government (DILG), lumabas na 77% ng mga LGU sa bansa ang gumamit ng malaking bahagi ng kanilang Special Education Fund (SEF) para sa paggawa at pagsasaayos ng mga silid-aralan. Sa 2024 Seal of Good Local Governance assessment, 1,332 LGUs ang gumamit ng hindi bababa sa 85% ng kanilang SEF para sa edukasyon.
